آخر المواضيع
الرئيسية » ريادة اعمال » يعني ايه startup ؟ ” ألف باء ريادة أعمال “
يعني ايه startup ؟ ” ألف باء ريادة أعمال “
ما معنى ريادة الاعمال؟

يعني ايه startup ؟ ” ألف باء ريادة أعمال “

ال statrtup من المصطلحات المعروفة في ريادة الاعمال .. وبما اننا كرواد أعمال إتفقنا إننا نقف عند كل مصطلح ونبصله بنظرة مختلفة .. تعالى نوضح

يعني ايه startup ..

أولاً لازم تعرف حاجة .. حالة الحماس والشغف اللي بتجيلك فجأة لما بتجيلك فكرة مشروع .. دي حاجة جميلة جدا .. ولكن ده مش هيخليك مميز او عبقري زمانك لمجرد ان الفكرة جاتلك !

في مجال البيزنس و ريادة الاعمال .. النجاح لمن يحسن استغلال الفرص ! .. النجاح بيكون للشخص اللي بيعرف يحول افكاره واحلامه لفعل ولواقع ملموس

وجود فكرة عبقرية جدا في دماغك .. مش كفيلة لوحدها انها تفيدك ولا تفيد البشرية في اي حاجة !

لو انت صاحب الفكرة ..وحد غيرك اتحرك وخدها ونفذها .. الفضل كله هيتنسب ليه هو .. وغالبا انت اسمك هيتنسي اساسا !

اصل هو اللي تعب .. هو اللي بدا .. هو اللي فكر في الامكانيات والموارد المتاحة قدامه وخد الخطوة الاولى ونفذ المشروع .. ودفع وسهر و جمع فريق و ممكن يكون فشل مرة واتنين على ما ينجح الفكرة دي اساسا .. في الاخر الفضل هيكون ليك !

مش مصدقني صح ؟! .. لسا مقتنع ان رائد الاعمال هو شخص شعره منكوش وقاعد لابس نضارة كعب كوباية وماسك ورقة وقلم وبتيجي في دماغه فكرة عبقرية . يقوم مسجلها في ورقة ويفيد البشرية بافكاره ؟

او مثلا متخيلة شخص قاعد على ترابيزة اجتماعات الكبيرة الطويلة دي عارفها .. ولابس بدلة وقاعد بيتكلم مع الموظفين في الافكار والاقتراحات بتاعته ويخصم لده ويرفد ده ؟ 😀

تعرف ان واحد من اهم وانجح رواد الاعمال في العالم .. اللي مفيش حد ميعرفوش طبعا .. مارك زوكربيرج .. صاحب موقع التواصل الاجتماعي الشهير ال Facebook .. الفكرة دي كان واخدها من مجموعة شباب تانية اساسا !!

وبعد ما خدها ونفذها لانه كان عنده الامكانيات اللي يحقق الفكرة دي لواقع حقيقي وزود عليه لمسة خاصة بيه وافكار جديدة بقى من عنده .. وفجاه بقى هو صاحب الانجاز العظيم ده ؟؟

عايزين نوصل لايه بعد كل الرغي ده ؟

عايزين نوصلك فكرة واحدة مهمة .. اللي بيخلي منك رائد اعمال عظيم او Entrepreneurship .. هو تحويل افكارك من مجرد افكار لفعل حقيقي ! .. وده بيسمى في لغة ادارة الاعمال .. ال startup

* يعني ايه startup ؟ .. بالبلدي كده الستارت اب

هو الشركات الناشئة

مشروع جديد قائم على فكرة معينة .. بتخدم الشركة هدف معين وتحقيق رسالة معينة وواضحة وبتكون لسا جديدة في السوق ولسا في مرحلة النمو .. حاجة كده طازة يعني ..

يعني من اهم سماتها .. انه بيكون مشروع جديد .. وبيتبنى فكر ابتكاري جديد .. او تقديم منتج او خدمة ذو طابع ابتكاري مختلف

و في مرحلة انشائك للستارت اب بتاعك .. بتكون مختلف عن اي مشروع تقليدي .. سواء في طريقة التمويل .. في المنتج او الخدمة .. في التقسيم الوظيفي للمشروع او حتى طبيعة الشغل وطريقته .. انت اللي بتحدد كل ده على حسب طبيعة الاستارت اب بتاعك و الطبيعة اللي تحددها اللي تخدم هدفك

” الابتكار وحرية استخدام الموارد هي السمة الرئيسية

في الشركات الناشئة srartup”

و باختصار عشان الموضوع يبقى واضح .. startup يعني :

  • انشاء مشروعك الخاص: ودي سهلة مش محتاجة توضيح.
  • كل المفروض مرفوض : بمعنى ان الحرية والابتكار هي اهم شئ في انشائك لمشروعك
  • ابدا بالمتاح معاك : متستناش تمويل بطريقة معينة ولا قرض من البنك ولا اي طرق تقليدية .. لو فكرت هتلاقي طرق وامكانيات كتير تقدر تقوم بيها مشروعك
  • انت مش موظف ! : يعني انسى شوية طريقة الشغل الموظفيني المعروفة بتاعة الشغل بمواعيد وبتروح تؤدي بعض المهام التقليدية المعروفة وتروح بيتك وشكرا ! .. لا
    انت هنا المتحكم في كل حاجنة في الشغل .. ممكن شغلك يزيد عن ال12 ساعة في اليوم .. الموضوع محتاج منك قدرة هائلة على التنظيم للوقت .. عشان تعرف تنجح وتبني فريق ناجح.
  • مدرس تاريخ وفرنساوي لحد ما يجيبوا مدرس فرنساوي : اه متستغربش 😀
    انت في بداية المشروعك هتبقى كل حاجة .. هتشتغل تخطيط وتنفيذ وتسويق ومبيعات و ادارة موارد بشرية وكله !
    فلازم تهيأ نفسك لده وتستعد نفسيا و جسديا على انك تكون قد المهمة دي .. في بداية الاستارت اب بتاعك .. من الطبيعي انك تكون لوحدك وتقوم باكتر من مهمة بنفسك .. فخد نفس عميق كده وانت داخل عالخطوة دي .. وحدد هدفك قصاد عينك عشان تعرف تكمل صح
  • خلاويص ؟ .. لسا ! :
    هييجي عليك وقت تحس انك خلاص وصلت .. وهاااه اخيرا عدينا .. وهووب .. تكتشف انك لسا في البداية ! .. وان دي يادوبك كانت اول خطوة ! 😀 .. عشان كده .. المرونة ثم المرونة ثم المرونة .. لازم تكون مرن جدا وانت بتنشا ال startup بتاعك .. وتستعد لمواجهة جميع المراحل وتتبع سياسة النفس الطويل عشان خاطر توصل بالاستارت اب بتاعك لبر الامان .. او عالاقل لمستوى شبه مستقر.
  • انا اللي حاطط الخطة وانا اللي اقول يلا :
    انسى السياسة دي تماماااا ! .. مش معنى انك عملتلك ستارت اب على قدك كده وعينت نفسك ceo عليه .. بقيت انت الصح وانت المدير ! ..لا لا الكلام ده لسا بدري عليه جدا كمان .. انت في البداية مجرد شخص عنده فكرة وبينفذها .. لكن محتاج لخبرات ناس كتييير .. ومحتاج لشخصيات مختلفة و فريق ينقذ مشروعك .. وبالمناسبة مش معى انك ال ceo .. اني اقعد في مكانش وبس .. انت محتاج تعمل كل حاجة بايدك في الاول عشان لما تيجي تحط كل شخص في المكان المناسب .. تبقى عارف انت بتعمل ايه .. وفي نفس الوقت مش لازم تحط ايدك تحت ضرس حد
    ده مش معناها برضه انك تعمل كل حاجة بنفسك او انك تبقى دارس في كل حاجة بنسبة 100% .. بس عالاقل لازم تبقى فاهم ومجرب عشان محدش يستغلك .. وخليك متعاون وانسى انك ceo لفترة معلش كده في البداية .. ده لمصلحتك والله 😀

طيب ايه اول خطوة المفروض اخدها عشان ابدا ال startup بتاعي ؟

قدامك طريقين :

  • يا تبدء في مشروع حقيقي  في نفس مجالك او مشابه لمجالك .. وده هيديك خبرة عالية جدا عشان لما تبدا في مشروع جديد وتتعلم منه ومن اخطاؤه ومن طبيعة العمل والتحديات اللي واجهها وكل ىحاجة .. فرصة نجاحة بمشروعك هتبقى اكبر بكتير وفرصة وقوعك في الخطا هتقل اكيد !
  • الطريقة التانية هو انك تستعين بخبرات السابقين وتسال وتستشير وتبدا في الخطوة بقلب جامد .. الموضوع هيبقى فيه مجازفة .. بس مع الاستشارة وبعض المرونة والاصرار .. هتعرف تنجح في مشروعك الجديد بتاعك

وفي مقالاتنا الجاية هنبدا نتكلم عن كل حاجة واحدة واحدة .. ممكن تحتاجها في طريقك وانت بتبدا ال startup بتاعك 

عن ايثار هشام